SATUA SANG MUUN LAN SANG LANJANA

Rikala jatmane tedun magae ring carik, irika paksine mapupul ngwilang teda ageng alit pada asritingkah ipune. Kaget wenten paksi saking delod segara paksi mun wastan ipune, sareng ngawilang tetadaan ring carike punika, krura ageng ipune. Paksi sane lianan nenten purun nesek antuk ageng ipune, samaliha antuk galak ipune, asing parek ulah ipun ngantos miang saananing paksi muun sareng irika mangremon.

Kabaos pun paksi Lanjana, rikala ipun ngindang ring awan, kagaok ngenot timgkah I Paksi Muun punika, sarwi mataken sang lanjana, “ Heh ne jro uli dija, tumben tepuk tiang dini bareng ngalih teda, buina liwat degag tingkah jerone “.

Masaut Sang Muun, “ Ah mapi – mapi iba tuara nawang degag tingkah ibane teken kai, ne tui ratuning paksi uli delod pasih “.

Nimbal Sang Lanjana, “ Tuin iba dadi ratu, kai tuara samang mratu teken iba, buina kai tonden taen kalah baan iba,tuin iba gede, bacin ibane tuara gadenan teken bacin kai, tuin iba makapid lumbang tusing edalem kai yen matepuk makeber “.

Sang Muun jengah ring dewek kasapunikaang raris masaut Sang Muun, “ Bobab mokak iba sesaman kedis kapecit nagih nglahang kai, ukudan iba makejang tuah lamun bacin ibane “.

Sang Muun raris meju, satsat kadi taluh bebek ageng bacin ipune. Sang Lanjana karag kirig raris makecos ningkrik duur bacin kebone, sambilange ipun mamunyi. Pamunyin Sang Lanjana, “ Heh Sang Muun, nene iwasin bacin kaine !“.Sang Muun ipun bengong ngiwasin bacin Sang Lanjana tur mrasa kaon. Masaut malih Sang Muun, “ nah jani kai kalah gedenan bacin ibane, indaang jalan jani mategeh – tegehan makeber “.

Nimbal Sang Lanjana, “ Nah jalan, mai tutug kai !” Ngraris ipun Sang Lanjana ngrihinin makeber. Sang Muun ngetut pakeber ipun Saang Lanjana, disampune tampek gelis Sang Lanjana menceg ring tendas Sang Muun sambilanga nyokcok tendas ipun sang Muun.Sang Muun ipun tan wenten ajin maliha tan mrasa tendasipune ka inggapin antuk Sang Lanjana, santukan Sang Lanjana ipun Paksi alit.

Sampun tegeh ring awan, Sang Muun raris makaukan, dingeh ipun munyin Sang Lanjana kantun ba duur, age tingkah Sang Muun ngamunggahang ngntos sawat ring bioma mrasa tendas ipun ngahngah, maliha tan sida antuk ipun malih ngamunggahang, raris ipun makaukan. Pamunyin Sang Muun’ “ Heh Sang Lanjana, awake jani mrasa kalah, tong sida baan nutugcai, buina tendas kaine ngahngah bas tegehe kai makeber, jalan jani pada tuun !”.

Ngraris Sang Muun nedunang miwah sang Lanjana ngicegang nyokcok tendas ipun ngantos maklupakan kulit tendasipune.

Di sampune andap, Sang Lanjana gelis makecos ring angkasane masangkliban. Sang Muun kasakitan naanamg kulit tendas ipune maklupakan.